– रवीन्द्र मिश्र, संयोजक, साझा पार्टी
तिमीलाई थाहा छ, मित्र ?
सन्सारका सुन्तरतम् शब्दहरू शायद
तिमी र मबारे लेखिएका छन्
तिमी र मजस्ता अर्बौँ मान्छेहरू
ठूला, ठूला विद्वानका विचार, र
अनुसन्धानका विषय भएका छन्
‘नमस्ते नेपाली डट कम्’ मा तपाईको व्यवसाय वा संघ संस्थाको प्रवर्द्धन र प्रचार प्रसार गरेर व्यवसायिक लाभ लिनुहोस् :
तिम्रो र मेरोलागि
रक्तिम युद्धहरू लडिएका छन्
ठूला-ठूला नेता
तिम्रो र मेरो गर्भबाट जन्मिएका छन्
याद गर त, तिनको आगोजस्ता भाषणमा
उनीहरू होइन, तिमी र म दन्किएका छौँ
विचार गर त, तिनको विचारको गहिराईमा
उनीहरू होइन, तिमी र म चम्किएका छौँ
तिम्रो र मेरो नाममा तिनले आकाशबाट
कहिल्यै नझर्ने चन्द्रमा झारिदिए
तिम्रो र मेरो नाममा तिनले धर्तीबाट
कहिल्यै नउड्ने सपना उडाइदिए
तिमी र म महान काव्यका अङ्ग बनेका छौँ
तिमी र म महान कलाका रङ्ग बनेका छौँ
हाम्रो आँशु संगीत बनेर झन्क्रित भएको छ
हाम्रो जीवन रङ्गमञ्चमा मञ्चित भएको छ
संझ त एक पटक
हाम्रा खिया परेका हात र सुकेका नलिखुट्टा
हाम्रा टाक्सिएका छाति र च्यातिएका धोती
गरिवीको कर्दले छिया, छिया पारेको मुहार
उमेर नै नपुगी बुड्यौलिएको अनुहार
संझ त एक पटक
तिमीलाई र मलाई जिवन्त उतार्ने
ती लेखक, कवि, चित्रकार
साहित्यकार अनि संगीतकार
ती अनकौँ विद्वान र विचारक, सबैले
ठूलाठूला पुरस्कार पाएका छन्
मञ्चमा माला लाउँदा नि
हाम्लाई नै संझिएर भावुक भएका छन्
तर साथी तिमी र म
पानीको एक घुट्काले धानेको सासमा
कहिल्यै नभेटिने लक्ष्यको आशमा
हिँडेको हिँड्यै छौँ,हिड्यै छौँ
लक्ष्यमा ती पुगे
जो तिम्रो र मेरो कथा लेख्छन्
लक्ष्यमा ती पुगे
जो तिम्रो मेरो व्यथा बेच्छन्
तिमी र मचाहिँ
कहिल्यै नपुगिने गन्तव्यको आशमा
हिँडेको हिड्यै छौँ।